LA UNION -Mararaem iti inaramid ti maysa a multicab driver ditoy syudad ti San Fernando agsipudta saan na a naginteresan ken impulang na ditoy Bombo Radyo La Union idi rabii, iti maysa a women’s wallet a naglaun iti rinibu a kuwarta, agraman IDs ken dadduma pay a napapateg a dokumento.
Iti honest driver ket nabigbig a ni Philip Tiam, adda iti umno nga edad, residente ti Barangay Sevilla ditoy syudad.
Iti eksklusibo a pannakiuman kenni Tiam, kinuna na a maysa met laeng a pasahero a lakay ti nakakita iti naregreg a wallet iti uneg ti iman-maneho na a multicab.
Dagus met nga immay in-claim ditoy Bombo Radyo iti akinkukua ti nasao a wallet, a nabigbig iti nagan a Susan Zamoranos, sigud a barangay kagawad, ken kalugaran met laeng ni Tiam iti Barangay Sevilla.
