LA UNION – Daydayawen ti adu nga umili ken netizens iti panagbalin a napudno ti maysa a tricycle driver a nagipulang iti napidotna a wallet a naglaon iti P20,000 a cash idiay ili ti Naguilian, La Union.
Daytoy ket ti 40-anyos a ni Artemio Bambico a taga Barangay Bariquir iti nasao nga ili.
Iti pannakiuman ti Bombo Radyo kenni Bambico, kinunana a nakitana ti nasao a wallet iti uneg ti manmanehuenna a traysikel idi nga alaenna ti ikawesna a kapote.
Saan nga ipagarup ni Bambico a naglaon iti P20,000 a kwarta ti wallet a nakapanagan kenni Purificacion Apillanes a residente iti Barangay Dallipaoen, Naguilian.
Gapu iti daytoy, nagturong ti nadakamat a tricycle driver iti Naguilian Police Station tapno ipakaammona a nakaipidot daytoy iti wallet a naglaon iti kwarta, ngem naiparna nga adda sadiay ti makinkukua nga agpatpatulong kadagiti pannakabagi ti linteg.
Sigun kenni Bambico, no pay nakapoy iti masapsapulanna nga agpaspasada iti traysikel gapu iti epekto ti COVID-19 pandemic ket saan a simmagid iti panunotna a tagikuaen ti napidotna a banag lalo no saanna a nagrigatan.
Kabayatanna, dinayaw met ni Maj. Judy Calica, hepe ti Naguilian Police Station, iti inaramid a kinasayaat ni Bambico.
Imbatad ni Maj. Calica a nabang-aran ken nagyaman met ni Apillanes kenni Bambico gapu ta ti nasao a kwarta ket paggatangna iti materiales para iti pagtaenganna.
