Nagkedked ni Mamamayang Liberal Partylist Representative Leila de Lima nga agkomento iti linaon ti dua a reklamo maipapan iti impeachment maibusor kenni Presidente Ferdinand Marcos Jr.
Naipasa iti House Committee on Justice dagiti dua a reklamo idi kalman, kagiddan iti panagsubli ti sesion ti House of Representatives.
Iti pannakiuman ti Bombo Radyo iti mammanday-linteg, napagsaludsodan daytoy no tumakder kas natibker a reklamo ti dua nga impeachment complaints ken no umdas iti nakapauneg a grounds kadagitoy.
Nagkedked iti mammanday-linteg nga agkomento maipapan iti merito ken ti grounds dagiti reklamo gapu ta kasapulan a talantanen pay ti nasao a komite a nadutukan a mangammo no umdas iti porma ti nasao a reklamo.
Ni De Lima ket maysa kadagiti ex-officio member ti Committee on Justice ken segun kenkuana, posible nga ibilang ti publiko a pre-judgement no agkomenton dagiti miembro ti komite a saan pay a naad-adal wenno natalantan iti linaun ti reklamo.###
