Inyusuat ti House of Representatives iti kaunaan a LegisHear Town Hall iti Isabela State University idiay Echague, Isabela tapno ilawlawag iti publiko iti proseso ti panagaramid ti linteg ken talantanen dagiti napateg a singasing-linteg nga agur-uray iti Kamara.
Karaman kadagiti natalantan iti KALINGA Act, dagiti gakat nga amiendaran iti Rice Tariffication Law, ken iti legislative process. Naaddaan met ti open forum a nangted iti gundaway kadagiti timmabuno nga agsaludsod ken agsingasing.
Segun kenni House Speaker Bojie Dy, panggep ti LegisHear a mangngegan dagiti kapanunotan ti publiko tapno mapaimbag dagiti singasing linteg ken masigurado a sumungbat dagitoy iti kasapulan dagiti umili.
Kenuna met ni House Secretary General Cheloy Velicaria-Garafil a dagiti topiko iti tunggal LegisHear ket maibasar kadagiti napateg nga isyu iti tunggal probinsia.###
