Pormalen nga inpasa ti House of Representatives idi rabii iti Committee on Justice dagiti dua a beripikado nga impeachment complaint maibusor kenni Presidente Ferdinand R. Marcos Jr., kalpasan a mairaman iti Additional Reference of Business ti plenaryo.
Indauluan ni Deputy Speaker Yevgeny Vicente “Bambi” Emano iti sesion idi naaramid iti referral.
Ti umuna a reklamo a naipila idi Enero 19, 2026 ket nagtaud kenni Atty. Andre R. de Jesus ken in-endorso ni Deputy Minority Leader ken Pusong Pinoy Party-list Rep. Jernie Jett Nisay.
Ti maikadua a reklamo a naipila idi Enero 26, 2026 ket manipud kadagiti aktibista ken pribado nga indibidual nga indauluan da Liza Maza, Teodoro Casiño, Renato Reyes Jr., Atty. Neri Colmenares, ken ni Ronaldo “Ka Jerome” Adonis, ken in-endorso babaen ti ACT Teachers, Gabriela, ken Kabataan party-list representatives.
Kalpasan a mabasa dagiti titulo iti plenario, opisial nga inrefer dagiti reklamo iti Committee on Justice, a mangsukimat iti kinaumiso ti porma ken linaon a maitunos iti Konstitusion ken dagiti pagannurotan ti Kamara.
Impaganetget dagiti lider ti Kamara nga iti referral ket saan a kaipapanan nga addan ti naaramid a desision maipapan iti merito dagiti reklamo, no di ket pangrugian laeng iti proseso ti panagsukima a maibasar iti linteg.###
