Indineklara ti House Committee on Justice ita nga aldaw ti Miyerkules, Marso 18, 2026, nga adda ti umdas a basaran dagiti dua nga impeachment complaints kontra kenni Bise Presidente Sara Duterte, a mangited-dalan iti panagrugi ti panagdingeg inton sumaruno a lawas.
Segun ti House panel, saan a direkta a sinungbatan ni VP Sara dagiti alegasion kontra kenkuana iti “Answer Ad Cautelam” nga impilana kas sungbat kadagiti reklamo.
Dagiti dua nga impeachment complaints ket naglaun dagiti akusasion maikontra iti Bise kas iti betrayal of public trust, culpable violation of the Constitution, ken dadduma pay, mainaig iti maipagarup a biddut a panagusar iti ₱612.5 million confidential funds, ken panangipangta iti biag ni Presidente Ferdinand Marcos Jr. ken ti pamilyana.
Kenuna ni House Deputy Minority Leader Leila de Lima nga iti sungbat ti Bise ket saan a sumungsungbat iti alegasyon. Awan met iti palawag maipapan ti malversation of funds, anomalous disbursements, wenno kadagiti envelopes a naipaay kadagiti sumagmamano nga opisial ti Department of Education.
Gapu ti daytoy, mabalinen nga ituloy ti komite iti impeachment hearing proper ken sadiay a matalantan ken masukimat dagiti ebidensya ken testimonya ti agpada a reklamo ken ni VP Sara.
Sakbay ti binotos, immunan nga inlawlawag ni House justice panel chair ken Batangas Second District Rep. Gerville Luistro, nadagsen dagiti alegasion ken kasapulan ti konkreto a sungbat.
Innayon na pay a mangrugi iti pormal a panagdingngeg inton Marso 25, 2026.
Kabayatanna, inaprobaran ti House of Representatives iti resolusyon a mangited-dalan iti komite nga ituloy iti impeachment hearing uray naka-recess.###
