BR LA UNION – Agsagsagana ti House prosecution panel para iti naituding nga oral arguments mainaig iti two-thirds vote threshold iti agtultuloy nga impeachment trial ni Bise Presidente Sara Duterte.
Mangisayangkat ti oral arguments ti Senate Impeachment Court inton sumaruno a lawas, ken naawis manen dagiti retirado a huwes ti Korte Suprema a mangipaay iti pananglawlawag iti umno a panagkuenta ti dua a kakatlo wenno 2/3 vote manipud iti pakabuklan a miyembro ti Senado, partikular dagiti senador a saan a makipaspaset iti proceedings.
Segun kenni Atty. Hez Montalan, Deputy Spokesperson ti House Prosecution panel, nainget a rep-repaswen ti legal team-da amin a mainaig a linteg ken jurisprudence a maiprisinta iti korte.
Kinuna ti abogado a pabor iti biang ti prosecution a baliwan ti denominator manipud iti pakabuklan a 24 a senador ken ibilang laeng dagiti aktibo a makipas-paset iti trial, nupay respetuenda latta ti maudi a desisyon ti impeachment court.
Kabayatanna, takderan ti House panel ti kinapateg ti panangayab kenni Davao City Mayor Baste Duterte kalpasan nga inaprubaran ti impeachment court iti pannakaipaulog ti subpoena para iti panagparangna inton sumaruno a lawas.
Tarigagay ti panel a lawlawagan ti mayor dagiti rekord ti negosyo ti Bise Presidente nga adda iti sidong ti Office of the City Mayor, ken nailawlawag a ti panangpa-ayab kenkuana ket maibasar iti opisyal a kapasidad ken awan pakainaigan iti kinapudno nga agkabsat dagitoy.
