BR LA UNION – Ikagumaan ti House Prosecution panel a maileppas iti presentasyon na, sakbay nga ag-break ti impeachment court iti katengngaan ti Oktobre.
Nu subliyanan iti schedule nga inaprubaran ti Senate Impeachment Court, maisayangkat manipud Lunes agingga Biyernes iti panagusig manipud alas-10 ti agsapa agingga alas-6:30 ti rabii ken mabalin pay nga ag-extend da.
Agtultuloy daytoy agingga October 16 sakbay a naan-anay nga ag-break iti court proceedings tapno ipaayan dalan iti panangtalantan ti Senado iti 2027 national budget, kas maysa a legislative body.
Iti interview ti Bombo Radyo kenni panel spokesperson, Atty. Benjamin Tolosa Jr., imbaga na nga uray adu pay iti ipresenta a financial documents ni VP Sara, target dagiti prosecutor a leppasen iti kabiitan a panawen iti presentasyon.
Kinuna na a nu magun-od iti target ti panel iti tunggal aspeto ti Article II, posible a saanen a maiprisinta ti dadduma pay a nakalinya a testigo, a siguden nga inaramid ti panel kadagiti immuna a testigo.
Kabayatanna, posible nga agdesisyon iti sumaruno a lawas ti House panel nu ituloy da pay nga ipresenta iti bribery allegation iti impeachment trial kontra kenni VP Sara Duterte.
Segun kenni Atty. Tolosa, iti agdama ket awan pay iti napagdesisyunan ti panel nu ituloy da nga ipresenta ti nasao nga artikulo wenno naan-anayen a leppasen iti presentasyon kalpasan ti Article II.
Iti bribery allegation ket sakopen na iti maipagarop a panangipaay ni VP Sara iti ‘pasoksok’ iti sumagmamano nga opisyal ti Department of Education (DepEd) idi isuna pay ti sekretaryo ti nasao nga ahensiya.
