Impaganetget ti House Prosecution Team a nalawag a responsable ni Bise Presidente Sara Duterte kadagiti addang a mainaig iti ₱500 million confidential funds ti Office of the Vice President (OVP).
Segun ken ni House lead prosecutor ken Batangas Representative Gerville Luistro, nagparang iti testimonia dagiti saksi iti impeachment trial a naisayangkat iti panagkiddaw, panaggastos ken liquidation ti confidential funds babaen ti approval wenno maitunos iti pammilin ni Duterte.
Imbatad ni Luistro iti agtunos a testimonia da OVP special disbursing officer Gina Acosta ken OVP Assistant Secretary ken Assistant Chief of Staff Lemuel Ortonio.
Kinunana, agpada a napaneknekan dagiti saksi nga iti kiddaw para iti kompidensial a pondo, iti pannakaaramat ken pannakaipatulod ti accomplishment wenno liquidation report ket addaan basbas ti mangidadaulo ti ahensia.
Impasingked ti prosekusion nga iti nasao a posision ket iggem a mismo ni Bise Presidente Sara Duterte, nga isu ti OVP head idi nausar iti conidential funds.###
