BR LA UNION – Posible a mangisayangkat ti regular press briefing iti House prosecution panel inton marugyan ti impeachment trial kontra kenni VP Sara Duterte.
Segun kenni panel spokesperson Zia Alonto Adiong, ad-adalen dagiti prosecutor ti panangisayangkat daytoy, kas paset ti information campaign tapno malawlawagan ti publiko seknan dagiti mapaspasamak iti panagusig.
Tarigagay ti panel a maliklikan ti anyaman a pannakatikaw dagiti legal nga isyu a mangbalbalkot iti intero a proseso.
Namnamaen ngamin ti panel nga agbalin nga atiddog dagiti serye ti panagdengngeg ken sigurado a tutukan ti publiko iti pakabuklan a trial.
Malaksid iti media, tarigagay pay ti panel a direkta a makasarita ti publiko ken sungbatan dagiti salodsod .
Iti agdama, ad-adalen ti panel iti eksakto a format dagiti maisay-sayangkat a briefing ken tarigagay dagiti prosecutor a makaited ti regular updates, panangilawlawag dagiti proseso, projection, panagtaray ti kaso, ken dadduma pay.
Kinuna na nga ammo dagiti prosecutor iti kalawa ti interes ti publiko ket tarigagay da a mantiniren ti nasao nga interest iti tulong ti regular nga information dissemination.
