Nagpakdaar dagiti House prosecutors maibusor iti maipagarup a panagsaknap ti “kultura ti panangipangta” ken inpaganetget a rumbeng nga agserbi a kas nasayaat a pagarigan dagiti opisial ti gobierno gapu ta makaapektar dagiti tignay ken panagsasaoda iti publiko.
Segun kenni impeachment prosecutor ken Bicol Saro Party-list Rep. Terry Ridon, iti panggep ti impeachment case kontra kenni Bise Presidente Sara Duterte ket saan laeng a tapno tamingen dagiti maipagarup a nakaro a pangta kada Presidente Ferdinand Marcos Jr., First Lady Liza Araneta-Marcos ken sigud nga Speaker Martin Romualdez, no di ket pati pay iti panang-normalisa iti pangta.
Kinuna pay ni Ridon a rumbeng nga ipada iti pannakaipatungpal ti responsibilidad kadagiti amin nga agar-aramid ti pangta, opisial man wenno tagasuporta.
Kabayatanna, inbaga ni House prosecutor Manila Rep. Joel Chua a serioso iti alegasion gapu ta iti pangta ket maikontra iti Presidente ti Republika.
Kinunana, napateg nga ipakita a daytoy a klase ti kababalin ket awan ti lugarna iti serbisio publiko.
Inpaganetget met ni Deputy Speaker Janette Garin a ti isyu a madingdingeg iti impeachment court ket adda pakainaiganna iti maipagarup a pangta ti pammapatay, a kunana a saan a maibilang nga ordinario a panagsusupiat.
Pinaregtana pay dagiti opisial ti gobierno nga ipangruna iti nasayaat a panagsarita ken agbalin a pagwadan iti publiko.###
