LA UNION – Saan pay a nagsardeng iti panagwaras ti coronavirus idiay pagilian a Saudia Arabia.
Gaputi dayta, agtultuloy a maipatpatungpal dagiti quarantine guidelines kas ti strict home quarantine, panagsurot iti curfew manipud 6am agingga 3pm, ken social distancing uray kadagiti agpapaay a household workers.
Iti eksklusibo nga interview ti Bombo Radyo La Union kenni Cherry Ann Camat-Aduca, tubo ti Balaoan, La Union ken tallo a tawenen a household worker iti nasao a pagilian, saan da pay a rimuar iti balay ti amo da sipud idi Marso a naipatungpal iti nalawa a lockdown gaputi covid 19 pandemic.
Uray dagiti amo na kunana ket man-manu a rumuar ken masansan nga ag-order da laengen online iti taraon ken dadduma pay a kasapolan.
Segun kenni Aduca, ita a panawen ti pandemic ket nasay-sayaat iti kasasaad da agsipudta agtultuloy iti panagtrabaho ken panag-suweldo kumpara kadagiti agtrabtrabaho iti kompanya a nagsardeng ken dagiti dadduma ket naan-anay a napukawan ti panggedan.
Kabayatanna, kinuna ni Aduca a posible a maipasidong da amin nga agnanaed iti balay ti employer da, iti swab test kalpasan a nagpositibo iti virus ti maysa a driver da, nupay saan da a nakapolapol daytoy agsipudta agtaltalinaed dagitoy iti driver’s quarter.
Innayon pay ni Aduca, a nakatuding koma nga agawid ditoy pagilian idi Marso ngem naabutan ti lockdown.
Iti pagilian a Saudi ket nakailista ti 4,267 new cases iti uneg laeng ti maysa nga akdaw ken addaan ti 136,315 total confirmed cases bayat a 1,052 dagiti natayen ti sakit sadiay.
