Pinasingkedan ti Iran-aligned Houthi group sadiay Yemen iti drone strike idiay Jazan refinery ti Saudi Aramco ita a lawas.
Kinuna ti Saudi Energy Ministry a napartuat ti uram a dagos metlaeng a nasebseban, kasta met nga awan iti nadangran, iti Jazan refinery a kabaelan a mangiproseso ti aganay 400k nga inaldaw a bariles ti krudo.
Segun iti Houthis, nangiyuswat ida ti missile ken drone attacks sadiay Mocha, maysa a Red Sea port city idiay Yemen. Naharang ti air defenses dagiti drones a target ken dagiti commercial quay ken storage facilities.
Impadamag pay dagiti opisyales ti Yemen a pito a tattao dagiti natay ken naaddaan iti nalawa a perdisyon iti imprastraktura ti sangladan.
Napasamak dagiti panagraut, sumagmamano nga aldaw sakbay iti panagperma ti Saudi Arabia, Turkey, ken Pakistan iti defense pact. Nakailanad ditoy nga aniaman nga armado a panagraut iti sadinno man kadagiti tallo a pagilian ken maibilang kas panagraut metlaengen kontra ti am-amin.
Saan pay a nalawag iti agdama iti tignay ti Turkey ken Pakistan apaman kumaro iti tension ti nagbaetan ti Saudi Arabia ken kadagiti Houthis.
Impaganetget met ni Turkish Foreign Minister Hakan Fidan a saan a nakapamaysa iti katulagan kontra Iran wenno aniaman a pagilian, nu ketdi seguridad para kadagiti tallo.
