Inpakaammo ti Armed Forces of the Philippines (AFP) a manamnama a sumangpet ti military airplane ti Estados Unidos ditoy Pilipinas tapno mangitulod kadagiti alikamen para iti humanitarian assistance ken disaster response operations (HADR) bayat nga agtultuloy ti mapaspasaran a dakes a paniempo ti pagilian.
Segun ken ni Philippine Air Force (PAF) deputy spokesperson Major Joseph Calma, ti eroplano a KC-135 nga addaan kadagiti alikamen ti HADR ket agdama nga adda sadiay Japan ken ur-urayen laengen ti clearance tapno makatayab agturong idiay Clark Airbase.
Kinunana a dakdakkel daitoy ngem ti C-130 nga us-usaren ti AFP kadagiti airlift missions no adda dagiti didigra.
Inwaragawag ni Department of National Defense (DND) Secretary Gilberto Teodoro dagiti joint efforts ti AFP ken US Indo-Pacific Command kas sungbat kadagiti panawagan a tulong dagiti apektado a komunidad.
Ti panagusar kadagiti siam nga Enhanced Defense Cooperation Agreement sites kadagiti nagduduma a paset ti pagilian ket agserbi kas multi-role venues para kadagiti relief ken rescue operations.
Kabayatanna, impasigurado ti PAF nga amin nga air assets-da ket nakasaganan a mausar para kadagiti naapektaran iti aniaman nga oras a kasapulan dagitoy.
