Nagtignay ni Political Science Professor Antonio Contreras a nalawag ti nagbalin a waragawag ni Senador Rodante Marcoleta nga i-surrender lattan ti Kalayaan Group of Islands (KIG) laksid ti kinunana a ‘taken out of context’ laeng ken naikkan ti sabali nga interpretasyon daitoy.
Segun kenni Contreras, makapaliday nga arig na ibagbaga ni Marcoleta a saan a makaaw-awat dagiti Pilipino kadagiti kontrobersyal a waragawag, nga uray nu nakalawlawag met ti kayat a satwen a kas ti terminolohiya nga ‘i-give-up ang KIG’.
Kinuna iti propesor nga awan ti sabali nga interpretasyon kadaitoy, malaksid iti panang-surrender wenno bay-an lattan dagiti grupo ti isla – banag a naawatan metlaeng ti kaadduan a Pilipino.
Saan kunana a kasapulan ti ‘sophisticated analysis’ tapno maawatan ti bagito a senador agsipud ta nalaka laeng daitoy a mailasin, maisupadi iti impaganetget ni Marcoleta a biddut nga interpetasyon.
Inyapela ni Contreras iti senador a talnaan kuman ti ‘gaslighting’ agsipud ta maaw-awatan met dagiti Pilipio ti waragawag ti opisyal ti pagilian.
