Situtured a simmungbat ni Ian de Leon kadagiti palawag ti kabsatna a ni Lotlot de Leon mainaig iti mapapati a saan a panagkikinnaawatan iti pamiliada kalpasan a pimmusay ti inada a ni Nora Aunor.
Iti serye ti Facebook Stories, inlibak ni Ian ti alegasion a saan na nga inpakaammo kadagiti kakabsatna iti plano a mangipasdek ti one-person corporation (OPC) a mangasikaso iti tawid ken sanikua ti pimmusay a Superstar.
Segun kenni Ian, saan daytoy a kontra iti panangipasdek ti foundation para kenni Nora Aunor, ngem kayatna a siguraduen a naurnos amin dagiti legal a dokumento sakbay nga irugi daytoy. Kinunana nga adda dagiti kakabsatna idi napagsasaritaan ti plano ken saan na nga inlemmeng iti aniaman a detalye.
Inlawlawag met ni Ian nga awan ti panggepna nga iyimot kadagiti kakabsatna iti bingayda a tawid. Tinakderan na nga immunan nga inbagana a patas ti pannakabingay ti aniaman a nabati a sanikua ken napateg a suroten ti umno a proseso iti panagtalinaed ti sanikua ti inada.
Impaganetgetna pay ti suportana kadagiti kakabsat na a da Matet, Kiko, ken Kenneth, ken sipipinget a binusorna ti aniaman a waragawag a kunana a saan a maitunos iti kinapudno.
Kabayatanna, immunan nga inbaga ni Lotlot nga iti nagtaudan ti riri iti pamiliada ket saan a maipapan iti tawid ken pinaglibakan dagiti sumagmamano a waragawag a mainaig kenni Ian.
Agtultuloy a panagsasaritaan ti publiko iti isyu bayat maur-uray no maaddaan pay ti statement dagiti dadduma a miembro ti pamilia maipapan iti daytoy a banag.###
