BR LA UNION – Inwaragawag ni Davao City 1st District Rep. Paolo Duterte nga addan ti maipagarop nga inruar a warrant of arrest ti International Criminal Court (ICC) kontra kenni Senator Bong Go ken dua a sigud a pulis.
Segun kenni Duterte, naggapo iti maysa a “highly reliable source” ti impormasyon na, ngem awan pay ti opisyal a kumpirmasyon ti ICC.
Gaputi dayta, kwinestiyon ti mammanday linteg iti maipagarop a panangusar ti ICC kas “political weapon” kontra dagiti kalaban iti pulitika ti administrasyon.
Maipalagip nga immunan nga imbaga ni sigud a Senator Antonio Trillanes IV a posible a target ti ICC ni Go a maipagarop a “co-perpetrator” ni sigud a president Rodrigo Duterte seknan iti nadara a ‘war on drugs.’
Nagserbi pay ni Go kas Special Assistant to the President iti sidong ti Duterte administration.
Kabayatanna, pinaglibakan met ti Department of the Interior and Local Government (DILG) ken ti Philippine National Police (PNP) iti inwaragawag ni Pulong, ken imbaga na nga awan pay ti naawat da a pormal nga impormasyon wenno dokumento seknan iti makunkuna nga ICC warrants.
Innayon ti PNP, a nu adda man iti legal a bilin manipud kadagiti maseknan nga otoridad ken dimmalan iti umno a proseso, nakasagana da nga ipatungpal daytoy a maiyannurot iti linteg.
