Binilin ti International Criminal Court (ICC) Pre-Trial Chamber I ti prosekusyon a leppasenen dagiti ebidensya mainaig ti crimes against humanity kontra kenni sigud a presidente Rodrigo Roa Duterte sakbay wenno inton Hulyo 1, 2025.
Segun iti 20-a-pinanid a papel nga nairuar idi Abril 17, kasapulan nga ipamaysa ti prosekusyon dagiti amin a mausar nga ebidensya iti panagdengngeg ti kumpirmasyon iti kaso, karaman ti waragawag dagiti witness, translations, ebidensya a mabalin nga pumabor iti akusado, ken dadduma pay a dokumento kas maiyannurot ti Rule 77 ti ICC Rules.
Impaganetget pay ti korte a ti aniaman nga ebidensya a maisubmitir kalpasan ti nakatuding a petsa ket saanen a maawat pay.
Ni Duterte ket sumangsango ti crimes against humanity gapo kadagiti pammapatay ditoy Pilipinas manipud Nobyembre 1, 2011 agingga Marso 16, 2019.
Naarestar ti sigud a presidente idi Marso 11 kalpasan a naggapo daitoy idiay Hong Kong. Agdama isuna a nakadetene sadiay The Hague, Netherlands.
Tallo nga aldaw kalpasan ti pannakaaestar na ket simmango isuna ti umuna a panagdengngeg ti ICC para ti confirmation of charges.
