Impaganetget ti Malacañang a saan a taktika tapno ibaw-ing iti atension ti publiko mainaig iti pannakairaman da Senador Ronald dela Rosa ken Senador Bong Go kas maipagarup a “co-perpetrators” iti kaso ni sigud a Presidente Rodrigo Duterte iti International Criminal Court (ICC).
Daytoy iti sungbat ni Palace Press Officer ken PCO Undersecretary Claire Castro iti statement ti PDP-Laban nga us-usaren kano ti administrasion iti isyu tapno ibaw-ing iti atension kadagiti alegasion ti kurapsion.
Segun kenni Castro, nabayagen a pending ti kaso iti ICC ken naipila daytoy sakbay a nagbalin a presidente ni Ferdinand Marcos Jr.
Awan ti impluensia iti agdama a gobierno iti ICC, isu a saan a rumbeng a pabasulen iti administrasion iti aniaman a findings iti korte.
Dinakamat pay ni Castro iti immuna a palawag ni Baguio City Mayor Benjamin Magalong nga adda ti report maipapan kadagiti biddut a napasamak iti kampania kontra iti droga, ken inallukoy iti media a dumawat ti detalye iti nasao a report.###
