BR LA UNION – Inlawlawag ni International Criminal Court (ICC) assistant to counsel Atty. Kristina Conti a saan a gastosan ti gobyerno iti partisipasyon ti pamilya dagiti biktima kas witness iti ICC case ni sigud a president Rodrigo Duterte.
Segun kenni Conti, iti ICC ket addaan ti bukod a pondo maipapan ti daytoy.
Impaganetget na nga istrikto unay ti ICC seknan iti kwalipikasyon dagiti testigo, ken lalo pay nga istrikto iti kwalipikasyon nu iserrek iti witness protection program agsipudta adu ti maipawil.
Maipagarop a saan nga angaw iti agserbi a witness iti ICC agsipudta saan dagitoy a maibilang a bakasyunista, agsipudta awan ti nawaya nga schedule dagitoy ken agbalin a limitado iti garaw dagitoy.
Saan da a maikonsidera a freeloaders, agsipudta ti kasukat daytoy ket kaawan ti pagbiagan, security threats, ken psychological trauma.
Apela ni Atty. Conti, saan a pukawen ti isyu a panagpatay a maipagarop nga immandar dagiti sigud nga opisyal.
Kinuna na pay a nasken nga imula iti panunot a saan amin a natay ket drug addict agsipudta adda dagiti biktima nga ubbing, nataengan, ken napagbiddutan laeng.
Innayon pay ti abogado, nu kayat ti mangidatag ti kaso iti ICC wenno iti sadinuman seknan iti crimes against humanity wenno murder, mabalin met nga aramiden dayta, basta agsagana iti trabaho, ken saan nga umanay iti comments iti Facebook nga agbalin a basaran ti sensetibo a kaso.
