BR LA UNION – Impaganetget ti International Criminal Court (ICC) a ni sigud a President Rodrigo Duterte ket addaan ti direkta a kontrol ken suporta pinansyal iti nalawa a pammmapatay iti sidong ti anti-narcotics campaign.
Iti naisayangkat a confirmation of charges hearing idi kalman, Lunes, Pebrero 23 ngem saan a personal a dinar-ayan ni Duterte, impaganetget ni ICC Prosecutor Mame Mandiaye Niang a pinonduan ken personal a dinakamat ti sigud a presidente dagiti target ti Davao Death Squad wenno DDS.
Segun kenni Niang, dakkel ti kontribusyon ni Duterte iti panang neutralize dagiti kriminal ditoy Pilipinas babaen ti panagpatay.
Impaganetget ti prosecutor a malaksid iti regular salary, maipagarop a makaaw-awat ti cash per head dagiti direkta a suspek a sumursurot iti bilin ni Duterte, gaputi buteng, gunguna, wenno bulsek a panagtulnog.
Sumangsango ni Duterte iti tallo a bilang ti crimes against humanity gaputi kaawan ti due process para kadagiti biktima.
Maibasar iti datus ti gobyerno, umabot iti 6,200 dagiti napatay iti drug war, ngem impaganetget ti human rights groups a posible nga umabot iti 30,000.
Maituloy dagiti panagdengngeg ita nga aldaw ti Martes, Pebrero 24, inton bigat-26, agingga Pebrero 27.
