BR LA UNION – Impaka-ammo ni Ombudsman Jesus Crispin “Boying” Remulla a nangiruaren ti arrest warrant iti International Criminal Court (ICC) kontra kenni Senador Ronald “Bato” Dela Rosa.
Adda pakainaiganna daytoy iti alegasyon a crimes against humanity gaputi kampanya kontra droga ti administrasyon Duterte.
Ni Dela Rosa ket sigud a hepe ti PNP ken kangrunaan a nangipatungpal ti Oplan Tokhang.
Awan pay ti opisyal a dokumento a naawat ti Department of Justice seknan iti makunkuna a warrant.
Tinakderan met ti kampo ni Dela Rosa a saan a sakop ti ICC iti Pilipinas sipud idi rimmuk-at idi 2019.
Nupay kasta, impaganetget ti ICC a mabalin latta a maimbestigaran daytoy ken mausig kadagiti krimen a napasamak idi miyembro pay laeng ti pagilian.
Agingga ita ket awan pay ti baro a waragawag ni Sen. Dela Rosa seknan iti nasao a development.
