Nangipila ti prosecution panel ti International Criminal Court (ICC) iti maikadua nga updated list of evidence kontra kenni sigud a Presidente Rodrigo Duterte, segun iti bilin ti Pre-Trial Chamber idi Pebrero 10, 2025.
Segun iti pakaammo ti ICC, adda ti dua a baro nga item a nainayon kontra kenni Duterte, ngem agtalinaed a kompidensial iti annex gapu ta naglaon daytoy dagiti sensitibo nga impormasion dagiti saksi.
Dimteng ti update sumagmamano nga aldaw kalpasan a pinalubosan ti Pre-Trial Chamber iti prosecution ken defense a mangidatag kadagiti baro nga ebidensia.
Maipalagip a naarestar ni Duterte idi Marso 11, 2025, idi simmangpet daytoy manipud pagilian nga Hong Kong, kas paset iti imbestigasion ti ICC iti makunkuna a “war on drugs”.
Maibasar iti warrant ti ICC, mapapati a nangpartuat, pinunduan, ken nagarmas ni Duterte ti death squads a karaman iti panangpapatay kadagiti mapapati nga agus-usar ken aglaklako ti droga.
Naiturong isuna idiay The Hague iti kapada nga aldaw ken nagparang iti korte babaen ti video link idi Marso 14.
Mainaig iti daytoy, manon a daras nga pinagkedkedan ti Pre-Trial Chamber iti kiddaw ti defense ti sigud a presidente para iti interim release na.
Inkeddeng ti Pre-Trial Chamber ti confirmation of charges hearing para kenni Duterte inton Pebrero 23 agingga 27, 2026 idiay The Hague. Ditoy a maikeddeng no adda ti umdas nga ebidensia tapno naan-anay a maituloy iti kaso maibusor kenkuana.
Daytoy nga addang ket paset iti agtultuloy nga imbestigasion ti ICC kadagiti alegasion a panaglabsing iti karbengan pangtao kabayatan ti panagtakem ni Duterte kas sigud a Mayor ken Presidente ti Pilipinas.###
