BR LA UNION – Saan a kinumpirma ti International Criminal Court (ICC) nu addan ti inruar da nga arrest warrant kontra kenni Senator Ronald “Bato” Dela Rosa.
Segun kenni ICC spokesperson Fadi El Abdallah, ti anyaman nga isyu ken damag nga adda pakainaiganna iti ICC ket makita laeng iti opisyal a communication channels dagitoy.
Ti kaso nga agdama a makita ket ti maikontra kenni sigud a Presidente Rodrigo Duterte.
Maipalagip nga inbutaktak ni Ombudsman Jesus Crispin Remulla nga addan maipagarop nga impaulog ti ICC nga arrest warrant kontra kenni dela Rosa.
Uray ti Department of Foreign Affairs (DFA) ken ti Philippine Embassy idiay The Hague ket imbaga da nga awan pay ti naawat da a kopya ti arrest warrant kontra ti senador.
Sumangsango ni Dela Rosa iti kaso a crimes against humanity nga adda pakainaigan ti kampanya kontra iligal a droga ni sigud a president Rodrigo Duterte, ket ni dela Rosa ti hepe ti Philippine National Police iti dayta a panawen.
