BR LA UNION – Saan nga inaprubaran ti International Criminal Court (ICC) iti personal a panagbisita kenni sigud a President Rodrigo Duterte bayat ti pannakaisayangkat ti uppat nga aldaw a pre-trial “confirmation of charges” hearings kontra iti sigud a presidente.
Segun iti pamilya Duterte, tawag laeng iti telepono ti pinalubosan ti ICC.
Kabayatanna, kumpirmado nga innem nga abogado ti dumar-ay iti panagdengngeg tapno masiguro a maipresinta a nasayaat ni Duterte dagiti abogado a Pilipino.
Pakaibilangan ditoy da Atty. Salvador Medialdea, Atty. Martin Delgra III, Atty. Silvestre Bello III, Atty. Alfredo Lim Jr., Atty. Caesar Dulay, ken Atty. Salvador Panelo.
Pinagyamanan ti pamilya Duterte iti legal team ti sigud a presidente iti agtultuloy a serbisyo ken iti Filipino community idiay The Hague a sumupsuporta ken mangisak-sakit kenni Duterte.
Maisayangkat ti confirmation of charges hearings mangrugi iti Pebrero 23 agingga 27.
Maibasar iti website ti ICC, mangrugi daytoy iti oras alas 10:00 ti bigat agingga alas 3:00 ti malem idiay The Hague, ngem alas 5:00 ti malem agingga alas 10 ti rabii oras ditoy Pilipinas.
