Insubmitir ti Independent Commission for Infrastructure (ICI) iti Department of Justice (DOJ) iti resulta ti imbestigasionda a mainaig iti maipagarup nga anomalia kadagiti flood control projects, kagiddan iti opisial a panagpatingga ti operasion ti komision.
Indauluan ni ICI Chair Andres Reyes Jr. iti turnover ceremony ken dinar-ayan dagiti nangato nga opisial ti DOJ, karaman da Justice Secretary Fredderick Vida ken Prosecutor General Richard Anthony Fadullon, karaman ni NBI Director Melvin Matibag.
Segun kenni DOJ spokesperson Polo Martinez, dagiti naisubmitir a dokumento ket kapada laeng dagiti immun-una a naisubmitir iti Office of the Ombudsman. Karaman iti report dagiti sumagmamano a bulan nga imbestigasion ken siam a referral a mainaig dagiti natakuatan ti komision.
Inlawlawag ni Martinez a nakabasar iti hurisdiksion no ania nga ahensia ti mangasikaso kadagiti kaso—ti Ombudsman para kadagiti nangato ti ranggona nga opisial, idinto a ti DOJ ket mabalin a mangisayangkat ti maitutop nga addang wenno i-refer ti kaso iti National Bureau of Investigation (NBI) para iti kanayonan nga imbestigasion ken pannakaipila ti reklamo.###
