LA UNION – Inlawlawag ti lokal a gobierno ti Bacnotan, La Union no apay a kanayon a kasali ti Bacnotan kadagiti kapudotan a lugar ditoy Pilipinas.
Maibasar iti waragawag ti LGU-Bacnotan iti opisial a facebook page daytoy, iti intero a La Union, ti laeng ti Bacnotan ti addaan iti manned station ti Philippine Atmospheric, Geophysical, and Astronomical Services Administration (PAG-ASA).
Masarakan ti maaw-awagan nga Agrometeorological (AGRO-MET) station idiay Don Mariano Marcos Memorial State University-North La Union Campus (DMMMSU-NLUC), Sapilang, Bacnotan, La Union.
Dagiti laeng manned stations ti PAGASA ti agserserbi kas point locator iti monitoring dagiti heat index.
Kayat a sawen daytoy a ti laeng Bacnotan ti point locator ditoy La Union ngem saan laeng a ti Bacnotan ti addaan iti nangato a heat index no di ket ti intero a La Union ken ti kabangibang daytoy a lugar.
Iti intero a Region 1, lima laeng ti manned station ti state weather bureau.
Naipasidongen iti recalibration dagiti instrumento a maar-aramat idiay Bacnotan tapno masigurado nga umno ti datus a makalap ken agtaltaltalinaed a nangato ti heat index a mairekrekord kas idi kalman, April 12, ket nairekord ti 42 degrees celsius a heat index.
Mainaig iti kinapudot ti panawen, palpalagipan ti LGU-Bacnotan, La Union ti publiko a regular nga uminom iti danum, agitugot iti proteksion kontra iti init ken aginggat mabalin ket liklikan ti rumuar manipud 9:00AM agingga 3:00PM.
