LA UNION – Mangnamnama ti maysa nga Ilokana manipud iti Surfing Capital of the North a makaur-or daytoy iti umdas a puntos tapno mangabak iti REnextop Asian Surfing Tour 2017 nga agleppasto iti pagilian a China.
Immuna iti daytoy, nangabak kas second placer ni Daisy Valdez iti umna a leg ti nasao a surfing competition a naisayangkat idiay Bali, Indonesia idi napalabas a lawas.
Segun kenkuana, malaksid kadagiti surfers manipud Asya ket nakipaset met dagiti nagtaud iti Western countries.
Immapela met daytoy iti kararag iti publiko tapno agballigi kadagiti sumaruno a leg ti pasalip a maangay idiay Japan, Taiwan ken China kadagiti sumaganad a bulan.
Ni Valdez ket maysa laeng kadagiti 16 a nakisalip iti Women’s longboard ken shortboard category ken siguden a nangabak kadagiti surfing competition iti Pilipinas ken ballasiw-taaw.
