Laksid iti mabukbukek a tensyon ti nagbaetan ti Kamara ken Senado gapo iti impeachment proceedings ni VP Sara Duterte, mangnamnama latta ni House Deputy Speaker ken Iloilo Representative Janet Garin nga agsubli manen iti sigud a napintas a relasyon dagiti dua a balay pagpandayan-linteg ti Kongreso.
Agtalek ni Garin a saan nga agtungpal iti personal nga atake, pinnadinggeg, wenno pananguyaw kadagiti debate iti sesyon dagiti mamanday-linteg ken raemen dagitoy ti tunggal maysa para ti pagsyaatan dagiti Pilipino a pagserserbian da.
Nagtaud daitoy kadagiti sumagmamano a senador a nangiyebkas ti saan a napipintas a waragawag seknan ti saritaan ti impeachment ni VP Sara a nangigubuay iti impresyon a nagulo ita ti Kamara de Representantes.
Impaganetget pay ni Garin a saan a napansin iti nalawa a trabaho ken dedikasyon dagiti kongresista, agraman metten iti tarigagay ti Speaker of the House iti panagresolbar kadagiti problema nga itantandudo iti Kamara.
Nagpanawagan pay isuna iti panangisubli iti nangato a standard iti etika, diplomasya, ken propesyonalismo idiay lehislatura agsipud da adda dagiti gundaway a dagitoy ket malablabsing.
