Impasiguro ti National Police Commission (NAPOLCOM) nga agbalin a patas ti imbestigasyon da kontra kadagiti 12 a pulis a karaman iti kaso dagiti missing sabungeros.
Maipalagip nga immun-unan a pinaulogan ni NAPOLCOM Vice Chairperson ken Executive Officer Rafael Vicente Calinisan dagiti nasao a pulis ti 90 days preventive suspension kas addang tapno mapagtalinaed iti integridad ti imbestigasyon.
Makatulong met daitoy tapno maliklikan ti aniaman nga impluwensya dagiti testigo ken masakbayan nge ebidensya.
Karaman kadagiti kameng ti linteg a napaulogan ti suspensyon ket isuda Police Colonel Jacinto Malinao Jr., P/LtCol Ryan Jay Eliab Orapa, P/Major Mark Philip Simborio Almedilla, ken dadduma pay. Mainayon iti dayta ket napilaan da pay iti kaso a Grave Misconduct ken Conduct Unbecoming of a Police Officer.
Agpapada dagitoy a ninaganan iti whistle blower a ni Julie ‘Dondon’ Patidongan nga adda pakainaigan na iti pannakapukaw ken mapapati a panangpapatay kadagiti mapukpukaw a mammallot.
