Binabalaw ni Senate President Pro Tempore Panfilo “Ping” Lacson dagiti alegasion ni Senador Imee Marcos iti 2026 General Appropriations Act (GAA).
Segun kenni Lacson, awanan ti moral ascendency ni Marcos iti panangdillaw ti napirmaan a 2026 budget gapu ta uray isuna ket addaan met ti maipagarup a pork barrel wenno insertion iti 2025 national budget a dumanon ti ₱2.5 billion wenno ₱3.5 billion, kas maibasar iti impormasion manipud ti ‘Cabral files’.
Kwinestion met ti senador no apay ta saan nga imbaga ni Marcos dagiti alegasion na iti Bicameral Conference Committee, ken awan met ti manglaplapped kadagiti senador a paset ti Senate Blue Ribbon Committee nga agsarita maipapan kadagiti opisial a maipagarup a kasaraman iti flood control projects scandal.
Mainaig iti panangdillaw ti senadora no apay ta saan a naituloy iti panagimbestigar kenni House Speaker Martin Romualdez, kenuna ni Lacson nga awan ti umdas nga ebidensia a mangpaneknek iti pannakairaman ni Romualdez kadagiti maipagarup a flood control projects ken agtultuloy iti imbestigasion maibasar kadagiti ebidensia a makalkalap ti komite.
Maipalagip nga inakusaran ni Senador Imee iti 2026 GAA kas maysa a political budget ken saan a para iti panagdur-as ti pagilian. Imbagana pay a nabingay-bingay iti pondo para iti panangisayangkat ti plano nga impeachment kontra kenni Bise Presidente Sara Duterte, mainaig ti posible a panangipila ti baro a reklamo inton Pebrero kalpasan ti maysa a tawen a pannakaiparit ti panangipila ti impeachment complaint.
Kabayatanna, impaganetget met ni Marcos nga iti maipagarup a “soft pork” ti 2026 budget ket mabalin nga agtaud iti tulong pinansial ti gobierno babaen dagiti programa kas ti Medical Assistance to Indigent and Financially Incapacited Patients (MAIFIP) ken Assistance to Individuals in Crisis Situations (AICS),
Inallukoy ni Lacson ni Marcos a dummar-ay iti Senate Blue Ribbon Committee ket iruar dagiti amin nga ebidensia nga adda kenkuana, ken impasigurado a maipaayan isuna ti umdas nga oras no kasapulan.###
