BR LA UNION – Inwaragawag ti Bureau of Immigration nga awan pay iti nailista da a baro a rekord a mangibagbaga a nakarwaren iti pagilian ni Sen. Bato Dela Rosa.
Iti panagsalodsod ti Bombo Radyo, imbinglay ni Immigration Spokesperson Dana Sandoval nga iti agdama, awan ti baro a ‘travel records’ a na-monitor ti ahensiya.
Kasaruno daytoy iti naipadamag a nakapanawen idiay Senado, ni Senador Dela Rosa itay pasado alas-dos ti parbangon.
Inlawlawag met ni Sandoval a saan a sakop ti ahensiya iti maipapan ti isyu a ‘domestic flights’ partikular nu ti nasao a mammanday linteg ket agluas nga agturong iti sabali a lugar wenno probinsiya.
Ni Senador Dela Rosa, ket agdama a sumangsango iti kaso a ‘Crimes Against Humanity’ idiay International Criminal Court gaputi ‘war on drugs’ ti napalabas nga administrasyon.
Adda metten ti inyisyu nga ‘arrest warrant’ ti International Tribunal kontra kenkuana ngem iti agdama, saan pay a pormal a naiserbi gapu iti nakapenpen a petisyon idiay Korte Suprema.
