Imbaga ni Manila 3rd District Rep. Joel Chua a mabalin a makatulong pay iti 2028 presidential bid ni Bise Presidente Sara Duterte iti sangsanguenna nga impeachment case.
Segun kenni Chua, mabalin nga usaren ti Bise Presidente kas gundaway iti proseso tapno dalusan iti naganna sakbay iti eleksion.
Innayonna pay a no dumanon ti kaso iti Senado ken inton agangay ket maibasura, mabalin nga usaren daytoy ni Duterte a kas depensa iti kampaniana.
Iti agdama, adda pay laeng iti House Committee on Justice iti kaso. Nakatuding iti “hearings proper” inton Marso 25 ken naawis ni Duterte a dummar-ay, nupay adda ti indikasion a saan isuna nga agparang.
Impaganetget ni Chua nga iti impeachment ket maysa a “test of character” para iti siasinoman nga agtarigagay nga agbalin a presidente. Daytoy metten ti maikadua a daras ti dua a tawen a sumango ni Duterte iti impeachment proceedings.###
