Manamnama a malpas ti Senado iti paset ti impeachment case mainaig kadagiti maipagarop a grave threats ni Bise Presidente Sara Duterte sakbay iti panaggibus ti Hulio.
Segun kenni Senate impeachment court spokesperson a ni Atty. Reginald Tongol, napardas iti proseso kalpasan nga inikkat ti prosecution iti panagparang dagiti innem pay a saksi para iti Article 4 ti impeachment complaint.
Gapu iti daytoy, manamnama nga umakar iti panagusig iti sumaruno nga alegasion — ti mapapati a saan nga umiso a panagusar ti confidential funds ti Office of the Vice President (OVP) ken Department of Education (DepEd).
Iti Article 1 ti impeachment complaint, naakusaran ni VP Sara iti maipagarup a betrayal of public trust ken graft and corruption gapu iti mapapati a biddut a pannakausar ken pannaka-liquidate ti agdagup ti ₱500 million confidential funds ti OVP ken ₱112.5 million manipud ti DepEd.
Isagsaganan ti prosekusion iti panangayab kadagiti tallo a testigo para iti nasao a banag.
Karaman ditoy ni Marivic Pareja ti Legislative Archive Museum ti House of Representative; Violeta Constantino, sigud a manedyer ti Landbank Shaw Boulevard branch; ken ni Leonita Camposano, sigud a manedyer ti Landbank DepEd branch.
Segun kenni Senate President ken presiding officer Chiz Escudero, umuna nga ileppas ti prosecution iti presentasion kadagiti amin nga articles of impeachment sakbay a mangrugi kadagti depensa iti ebidensiada.###
