BR LA UNION – Kuwestiyunaran ni Davao City Rep. Paolo “Pulong” Duterte nu anya ti motibo dagiti adda iti likod ti proseso ti impeachment case kontra iti kabsat na a ni Vice President Sara Duterte.
Daytoy ket kalpasan nga indeklara ti House Committee on Justice iti maikatlo ken maikapat nga impeachment complaints a “sufficient in form and substance”.
Segun kenni Rep. Duterte, saanen a naklaat iti desisyon ti komite, ngem nalawag kunana nga adda dagiti puwersa a mangus-usar iti impeachment kas armas iti pulitika, imbes nga itandudo ti hustisiya ken patas a panagdengngeg.
Dinayaw na met ni Rep. Bong Suntay iti nagbalin a takder na a kontra iti panangipasa dagiti reklamo, laksid ti presyur manipud iti pada da a mammanday linteg.
Malaksid iti impeachment, dinakamat pay ni Rep. Duterte ti dadduma nga isyu a maipagarop a rumbeng nga ipaayan atensiyon ti Kongreso ken administrasyon, kas kunana iti imbestigasyon iti maipagarop a trillion-peso flood control corruption, alegasyon iti panagibunong ti pondo babaen ti maleta, panawagan para iti hair follicle drug tests iti amin a miyembro ti Kongreso ken Senado, kabilang iti “mastermind” ti impeachment ken pamilya da.
Iti sabali a bangir, pinawaywayan ti House Committee on Justice ni VP Sara Duterte ti 10 nga aldaw tapno agsumite ti sungbat iti dua a reklamo nga impeachment.
Maibasar iti reklamo, maak-akusaran ti bise presidente iti kaso a graft, corruption, ken panagpangta iti biag ti sigud a kaalyado a ni President Ferdinand Marcos Jr.
Nu saan a sumungbat ti bise presidente, maibilang daytoy a panangilibak kadagiti alegasyon.
Mapasarunwan daytoy ti panagdengngeg tapno i-determina nu adda probable cause sakbay nga iturong iti Kamara tapno pagbobotosan.
Dagiti reklamo ket nagsina nga indatag da Fr. Joel Saballa ken Atty. Nathaniel Cabrera.
Idi napan a tawen, na-impeach ni Duterte ngem inikkat ti Korte Suprema gaputi procedural issues.
Nu ma-impeach idiay Kamara ken guilty idiay Senado, maikkat isuna iti anyaman a posisyon nga elective agingga tunpal biag.
