Imbinglay iti ina ti maladaga a COVID survivor iti kapadasan da iti isolation room ti Ilocos Training and Regional Medical Center (ITRMC) iti uneg ti 23 nga aldaw a panagtalinaed tapno labanan iti COVID 19.
Iti interview ti Bombo Radyo La Union kenni Amy Flor Rimando ti Barangay Biday, San Fernando City, La Union kinuna na a nakaru a liday iti narikna na idi nagpositibo iti virus ti anak na a 3 bulan pay laeng.
Ngem iti likudan kunana ti nakaru a liday a narikna na, nagpannuray latta iti tured ken tibker na tapno maartaoan ti baby na iti nasao a pannubok.
Nagsadagan ni Rimando tunggal makarikna ti liday para iti nakaub-ubing pay laeng nga anak na, iti panagkararag ken pammati na iti Diyos.
Nagbalin kunana a sulit iti 23 aldaw a panagtalinaed na iti ospital, kalpasan nga immimbag ti anak na iti nasao a sakit.
Pinagyamanan met ni Rimando iti amin a frontliners iti ospital a timmulong ken nangasikaso kadakuada nga ag-ina ken dagiti barangay officials iti lugar da a nangted ti suporta kadakuada.
Maipalagip a ni baby boy ket nagpositibo iti COVID 19 idi April 27 ken naka-recover kalpasan a nag-negatibo iti resulta ti swab test na idi May 17.
Nakaawid dan iti balay da idi kalman kagiddan ti dagus a panangibabawi ti lockdown a naipatungpal iti Purok 2 ti nasao a barangay.
