Dakkel ti bimmabaan iti natgedan ti pre-need industry ti Pilipinas iti umuna a tallo a bulan ti 2026.
Maibasar iti report ti Insurance Commission, bimmaba iti net income ti sektor iti 88.1%, iti ₱140 million manipud ti ₱1.17 billion iti kapada a panawen idi napalabas a tawen.
Segun kenni Insurance Commissioner Reynaldo Regalado, nakaapektar iti natgedan ti industria iti panagbaba ti investment earning gapu iti global economic uncertainty, geopolitical tensions, ken agtultuloy nga inflationary pressures a nangbalbaliw iti panaggaraw dagiti pinansial a merkado.
Laksid daytoy, ngimmato iti pakabuklan a kinabaknang ti industria iti 12.2% wenno ₱32.36 billion iti katapusan ti Marso. Ngimmato met ti pakabuklan nga asset iti 9.6 a porsiento agingga iti ₱179.32 billion, bayat a dimmakkel ti premium income iti 12.3% agingga iti ₱6.53 billion.
Nanayunan ti 11.9% iti bilang dagiti nailako a pre-need plans iti nasurok a 244,000, a dandani amin kadagitoy ket life ken memorial plans.
Laksid ti dakkel a panagbaba ti kita, kenuna ti Insurance Commission nga agtaltalinaed ken agtultuloy dagiti obligasyon kadagiti plan holder.###
