BR LA UNION – Pimmaspas iti 2.9% ti inflation rate ditoy Pilipinas idi Disyembre 2024.
Daytoy ket mas nangatngato nu ikumpara iti nailista a 2.5% nga inflation idi Nobiyembre 2024.
Nababbaba met nu ikumpara iti 3.9% a nailista idi Disyembre 2023.
Iti press conference idi kalman, Martes, Enero 7, impadamag ni Philippine Statistics Authority (PSA) chief USec. Dennis Mapa a ti kangrunaan a makagapo iti napaspas nga inflation idi Disyembre ket iti napaspas met a panagngato ti presyo wenno balor ti pabalay, danum, kuryente, gas ken dadduma pay a langis.
Nangipaay daytoy ti annual average inflation rate ti Pilipinas idi 2024 iti 3.2%, mas nababa nu ikumpara iti 2023 annual average inflation rate a 6.0%.
Iti inflation idi Disyembre ket simrek iti patta-patta ti Bangko Sentral ng Pilipinas (BSP) a 2.3% agingga 3.1%, kaipapanan a nagun-od iti target ti gobyerno a pagtalinaeden ti average inflation para iti 2024 a 2% aginggan 4%.
Kabayatanna, awan met iti panaggaraw iti Food inflation idi Disyembre 2024 nga agtaltalinaed iti 3.5%.
Nababbaba daytoy iti food inflation rate idi Disyembre 2023 a 5.5%.
Impadamag pay ti PSA a ti average food inflation rate idi 2024 ket nailista iti 4.5%, mas mababa daytoy iti nailista a tinawen nga average food inflation rate idi 2023 a 8%.
