Intuding ti Trial Chamber III ti International Criminal Court (ICC) iti umuna nga status conference iti kaso ni sigud a Presidente Rodrigo Duterte inton Mayo 27, kas paset iti progreso ti panagusig.
Segun ti ICC, masapul nga isubmitir ti prosecution ken defense ti bukodda a dokumento ken ebidensia sakbay iti deadline a May 15.
Karaman ditoy dagiti trial brief, disclosure dagiti materyales, ken dadduma pay a napateg a detalye para iti kaso.
Panggep ti status conference nga ikeddeng ti timetable wenno eskediul ti mismo a trial, agraman dagiti sumaruno nga addang iti proseso.
Immunan a pinasingkedan ti Pre-Trial Chamber I dagiti tallo a bilang ti crimes against humanity kontra kenni Duterte, a puon tapno agabante ti kaso iti trial phase.
Babaen iti daytoy a tignay, pormalen nga irugi ti ICC iti panagdingngeg iti kaso ti sigud a presidente, nga agdama a nakadetain idiay The Hague sipud pay idi Marso 2025.###
