LA UNION – Pormalen a naipasidong iti inquest proceedings ken naidatagan ti kaso nga estafa iti makunkuna nga investment scammer, nga immunan a naipadamag nga inarestar ti pulisiya idiay Bauang, La Union.
Nabigbig ti suspek a ni Rosemarie Calimlim, 56, taga Baguio City.
Agtultuloy iti panang-duktal dagiti otoridad nu adda pay iti sabali a biktima ti suspek, malaksid iti ag-ina a nangireklamo kenkuana, gaputi inaramid daytoy a panangloko.
Dagiti agina a biktima ket isuda Agustina Laigo, 74, ken iti anak daytoy a ni Mona Fatima, 51, residente dagitoy ti Barangay Payocpoc Norte Oeste ti nasao nga ili.
Maipagarop nga umabot iti P3 million a kwarta manipud pay idi 2006 ti naipaimada iti nadakamat a suspek a nagpaay a collector iti agnagan Steve Jones.
Maipagarup a nagkari ti suspek kadagiti biktima nga agganansaya ti kwarta nga intalek dagitoy ngem saan a natungpal.
Iti kauddian a panagkiddaw manen iti kwarta ni Calimlim iti agina ket nangisayangkaten iti pulisya ti maysa nga entrapment operation iti uneg ti fastfood chain idiay Bauang, kasaruno iti pannakaaresto daytoy.
Naduktalan pay dagiti otoridad a bogus iti nagan nga Steve Jones a maipagarup nga ar-aramaten ti suspek tapno makaallilaw.
Iti agdama, ti suspek ket agtaltalinaed iti custodiya ti Bauang Police Station.
