Maysa a barko a masuspetsa a maus-usar kas “floating armory” idiay Gulf of Oman ti kinumpiskar ti militar ti Iran, segun iti maysa a maritime risk management company.
Naudi a nakita ti Honduras-flagged vessel nga Hui Chuan 70 a kilometro iti amianan a daya ti Fujairah idiay United Arab Emirates idi Mierkoles.
Segun ti operator, maus-usar iti barko kas pagurnungan ti armas para kadagiti private security firm a mangsalaknib kadagiti barko kontra iti panagraut dagiti pirata iti baybay.
Nupay kasta, saan pay a nakumpirma no ania a klase ti armas iti sakay daytoy ken no siasino dagiti agus-usar ditoy.
Immunan a naipadamag a kadawyan a maus-usaran dagiti floating armory vessel idiay Red Sea, Gulf of Aden, ken Gulf of Oman kas drop-off ken collection point dagiti armas ken ammunition para kadagiti maritime security personnel.###
