Nangilatag iti Iran ti sumagmamano a kondision a rumbeng a sungbatan ti Estados Unidos sakbay a luktan da ti Strait iof Hormuz, iti laksid ti Naval Blockade ken Sanction, panangsunod dagiti puersa ti militar ti U.S. iti aglawlaw ti Iran, ken panangipaay ti kompensasion para kadagiti perdision nga ingubuay ti gubat.
Segun kenni Mohammad Bagher Zolghadr, Secretary ti Supreme National Security Council ti Iran, agtaltalinaed a nakaserra iti napateg a ruta pangbaybay aginggana masungbatan ti Washington dagiti kidkiddawen ti Tehran.
Karaman met kadagiti kondision iti panangruk-at kadagiti frozen Iranian assets ken panangisardeng kadagiti panagraut ken panangipangta kontra iti Iran ken dagiti kaalyado daytoy iti rehion.
Kabayatanna, kenuna ni Iranian Foreign Minister Abbas Araghchi nga asidegen iti Iran ken Oman iti maysa a katulagan seknan iti panangmanehar ken panaglayag iti Strait of Hormuz.
Nupay kasta, impaganetget na a saan nga umdas iti nasao a katulagan tapno dagos a luktan iti estratehiko a dalan.
Segun kenni Araghchi, karaman kadagiti kasapulan a maresolba dagiti maipagarup a panaglabsing ti Estados Unidos iti memorandum of understanding a nabukel kalpasan ti ceasefire idi Hunyo.
Kenuna met ti Islamic Revolutionary Guards Corps a saan a nakadependir laeng iti negosasion ti Iran ken Oman iti panaglukat ti Strait of Hormuz ken kasapulan pay nga umuna a masungbatan dagiti kondision ti Tehran.
Nagballaag met iti Oman kontra kadagiti panagraut kadagiti barko a dumaldalan iti Strait of Hormuz ken impaganetget a dagiti nasao nga insidente ket panaglabsing iti international law ken territorial sovereignty.
Kabayatanna, kenuna ti Oman nga agtultuloy iti negosasion daytoy kadua ti Iran iti positibo ken konstruktibo a wagas.
Gapu iti agtultuloy a tension, agtaltalinaed a limitado iti panagdalyasat dagiti barko iti Strait of Hormuz.
Segun ti maritime data firm a Kpler, nasurok maysa dosena a barko laeng tunggal aldaw iti dumaldalan iti napalabas a lawas, maiyarig iti average a nasurok-kumurang 130 a barko tunggal aldaw sakbay ti gubat.###
