Sumangsango iti leadership crisis ti Iran kalpasan ti damag a natay iti opensiba ti Estados Unidos ken Israel ti Supreme Leader da a ni Ayatollah Ali Khamenei. Kimamro pay ti tensyon iti lugar idi natay metlaeng ti temporaryo a simmukat kenkuana.
Segun kenni US President Donald Trump, natay ni Khamenei ken dagiti dadduma pay a nangangato nga opisyales ti gobierno ti Iran iti insayangkat da nga “Operation Epic Fury,” nga inawagan met ti Operation Roaring Lion ti Israel.
Dagitoy dagiti naipadamag a natay:
Gen. Abdol Rahim Mousavi, army chief of staff
Gen. Aziz Nasirzadeh, defense minister
Maj. Gen. Mohammad Pakpour, commander ti Revolutionary Guard
Ali Shamkhani, Chief security adviser
Naipadamag pay a sumagmamano a miembro ti pamilya ni Khamenei ti natay.
Pinasingkedan ti Israel Defense Forces (IDF) ti pannakatay dagiti kangrunaan nga opisyales ti Iran a kas isuda Saleh Asadi, Mohammad Shirazi, Hossein Jabal Amelian, ken Reza Mozaffari-Nia.
Kas sungbat ket nangbukel ti Iran ti maysa a temporary leadership council a temporario a mangimaton ti pagilian da, pakairamanan da :
Masoud Pezeshkian, Presidente ti Iran
Gholamhossein Mohseni Ejei, lider ti hudikatura
Alireza Arafi, miembro ti Guardian Council
Segun kenni Parliamentary Speaker Mohammad Bagher Qalibaf, addan ti nakasagana a plano para kadagiti sumaruno a lider ti Iran.
Kasaruno ti pannakatay ti Supreme Leader ti Iran a ni Ayatollah Ali Khamenei ket napartuat ti damag: “Sino ngata ti agpili ti baro a Supreme Leader?”
Kabayatan a ti temporary leadership council iti agdama a mangidadadaulo, ti Assembly of Experts wenno 88-member panel dagiti Shia clerics met ti adda bileg da a mangpili ti sumaruno a lider.
Dagiti miembro ket mabotosan tunggal walo a tawen ken ad-adalen ti Guardian Council a pagaammo ti panang-disqualif kadagiti kandidato.
Saan a napalubosan ti sigud nga Iranian president a ni Hassan Rouhani Rouhani a makipaset ti eleksyon ti Assembly idi Marso 2024.
Babaen met ti vilayat-e faqih wenno guardianship of the Islamic jurist, ti supreme leader ket nasken nga addaan ti nangato a bileg ti ponagpolitika ken relihiyon.
Mainaig kadaitoy ket saan a naikkan ni Khamenei ti gundaway nga agpili ti sumukat kenkuana agsipud ta natay isuna ti opensiba ti Estados Unidos ken Israel isu a nalidem ti masakbayan ti liderato ti Iran.
Ti lalaki a putot na a ni Mojtaba Khamenei, 56-anyos, ti maibilbilang a kasukat na. Nupay awanan kapadasan ti gobierno ket pagaammo met isuna kas strikto ken nangato ti koneksyon na ti Revolutionary Guard.
Iti met sigud a Presidente ti Iran a ni Ebrahim Raisi, ket pimmusay gapo iti helicopter crash idi Mayo 2024.
