Silulukat ni Iranian President Masoud Pezeshkian iti diplomatiko a saritaan iti Estados Unidos, a kunana a nagastos ken awan mamaayna ngem ti komprontasion.
Daytoy ket sumaruno iti statement ni U.S. President Donald Trump maipapan iti “napateg nga update” iti gubat, ken ti immun-una a panagkunana a nagkiddaw ti Iran iti ceasefire—a inlibak ti Iranian Foreign Ministry.
Iti suratna, impapilit ni Pezeshkian a saan a mangrugi ti Iran iti gubat no di ket nakasagana a mangidepensa iti bagina, ken impaganetgetna ti kinapateg ti panagsasarita para iti masakbayan. Nalawag pay nga imbagana nga awan ti gura ti Iran iti U.S. ken dadduma pay a pagilian.
Nupay kasta, saan pay a masigurado no daytoy ti opisial a takder ti intero a gobierno, yantangay ti Nangato a Lider ti addaan iti maudi a pangngeddeng, agraman ti impluensia ti Islamic Revolutionary Guards Corps.
Kinuna pay ni Pezeshkian a silulukat a makisarita iti panagpatingga ti gubat a kasukat ti permanente a ceasefire, bayat nga idepensana dagiti addang militar ti Iran kas sungbat kadagiti panangraut maibusor iti dayta.
