Nainget a kinondenar ti Director General ken Adviser ti National Security a ni Eduardo Año ti iresponsable a testing ti Long March 12 rocket ti China a nangigubuay ti alarma ken peggad kadagiti residente idiay Palawan.
Segun kenni Año, dagiti napipigsa a panagbettak manipud iti rocket ti China ti nangigubuay ti panagbuteng kadagiti residente idiay ciudad Puerto Princesa kasta met dagiti kabangibang nga ili, nangruna kadagiti coastal barangays.
Sumagmamano kadagiti residente ti nakakita ken inaalaan iti video ti mailadawan kas “fireball” a limmabas iti tangatang sakbay a nagbettak ken nangdayeg ditoy daga. Laksid ti insidente ket awan met iti naipadamag a nadangran wenno nadadael a sanikua.
Impaganetget ni Año a dagiti nagsuwek a debris manipud iti rocket ket nalawag a pangta ditoy daga, kadagiti lugan ti baybay, eroplano, kadagiti mangngalap, ken dadduma pay a lugan a mabalin a matirwan idiay uneg ti drop zone. Innayon na a posible pay a tumpaw dagiti dadduma a paset ti debris ken maiyanod iti kaasitgan a kosta.
Agdama met a nakadeploy ti surface ken aerial assets ti gobierno tapno biruken dagiti posible a debris manioud iti Chinese rocket a naipatayab idiay Hainan Island.
Napakdaaran met iti publiko a saan nga iggaman ken liklikan ti umasideg kadagiti debris agsipud ta posible a naglaon dagiti kadagiti toxic fuel residue.
