LA UNION – Awan ti maipatungpal a lockdown iti ISONN Marketing a nakabase iti Barangay Acao, Bauang, La Union.
Daytoy ket laksid iti panag-positibo ti COVID 19 iti innem nga empleyado daytoy base iti Antigen ken RT-PCR test dagitoy.
Iti eksklusibo a pannakiuman ti Bombo Radyo La Union kenni Edgar de Soto, General Manager ti Isonn Marketing, kinuna na a naka-isolate ken naka-quarantine itan dagiti nasao nga empleyado, a kaadwan na ket ahente ken drivers ti kompanya.
Malaksid dayta, nairut a maipat-patungpal dagiti safety measures and protocols kontra COVID 19 iti uneg ti opisina, tapno maliklikan iti panagwaras ti nasao a virus.
Immuna ti daytoy, dagus a nagtignay ti Bauang-LGU nga idaulwan ni Mayor Menchie de Guzman seknan iti sentimiyento iti sumagmamano a mangmangged.
Adda ngamin dagiti saan a simrek iti trabaho gaputi buteng da a maakaran iti virus.
Segun met kenni de Soto nga awan ti problema kadakuada, nu saan man a sumrek dagiti apektado a mangmangged ket nawaya dagitoy a mangipila ti Leave of Absence gaputa palubosan da dagitoy, ken agsubli da inton awanen ti pagdanagan.
Naamwan ti Bombo Radyo a nak-koordinar a dagus ni Soto kenni Mayor Menchie de Guzman seknan iti nasao nga isyu.
Nangngegan met ni Mayor Menchie iti arungaing dagiti nasao a mangmangged iti programa ti Bombo Radyo La Union, isutgapuna a dagus dagitoy a nangiwayat ti inisyatibo.
Manaig ti daytoy, kinuna ni Municipal Health Officer Dr. Erwill O. Nunan, naka-isolate itan dagiti mangmangged a nagpositibo iti COVID-19.
Kagiddan ti panangallokoy na iti amin a mangmangged ken umili nga obserbaran iti minimum health standards para iti kinatalged kontra iti virus.
