BR LA UNION – Nagballaag ni Israeli Prime Minister Benjamin Netanyahu nga ituloy na ti giyera idiay Gaza nu saan a ruk-atan ti Hamas iti nabatbati a kawtibo dagitoy.
Daytoy ti nagbalin a reaksyon sni Netanyahu iti inaramid a waragawag ti Hamas nga isardeng da pay laeng iti panangwaya-waya kadagiti kawtiboda gaputi kunada nga inaramid a panaglabsing ti Israel iti ceasefire deal.
Kinuna pay ni Prime Minister Netanyahu, nu saan a mawaya-wayaan dagiti kawtibo agingga iti aldaw ti Sabado nga isuti nakatuding a panagturpos ti umuna a paset ti ceasefire ket saan nga agpang-ngadua ti Israel nga ituloy ti nakaru a rinnupak kadagiti Hamas.
Kinuna na a saan da nga agsardeng a mangraut iti kuta dagiti Hamas agingga a saan a maibus dagitoy .
Maipalagip nga imbaga ti Hamas a napunwan dan iti paulit-ulit a panaglabsing ti Israel iti ceasefire a naipatungpal idi Enero 19.
Sumagmamano kadagiti panaglabsing a dinakamat ti Hamas ket iti agtultuloy a panagatake ti Israel idiay Gaza, iti saan a panangipalubos a sumrek iti 600 nga aid trucks , iti saan a panangipalubos iti 200,000 tents a maipatakder, ken iti saan a panangresponde iti 50 a pasyente a nasken a maiturong iti ospital kada araw.
Maipagarop a linapdan pay ti Israel dagiti heavy equipment a mangisimpa kadagiti nadadael a pasdek idiay Gaza.
