Pinalagan ni House Deputy Speaker Janette Garin dagiti damag a mangiyuswat ti administrasyon iti Charter change ken panangpaatiddog ti termino kadagiti opisyal apaman mapaay ti impeachment case kontra kenni Bise Presidente Sara Duterte.
Kinunana nga awan ti kinapudno dagiti agsaksaknap a damag ken inawagan dagitoy a “pure chismis” laeng.
Reaksyon na daitoy kalpasan ti waragawag ni Sen. Imee Marcos iti posibilidad a panangamyendar ti Konstitusyon apaman kurang ti magun-od a botos idiay Senado tapno maikkat ti bise presidente.
Dinakamat ni Senadora Marcos ti mapapati a kanayunan a tallo a tawen a termino para kadagiti kongresista kasta met kenni Presidente Ferdinand Ferdinand Marcos Jr..
Impaganetget ni Garin a makatikaw ken addaan ti politikal a motibo dagiti alegasyon tapno maiyadayu iti pudno nga isyu ken maiturong iti pammabasol iti administrasyon, nangruna ket kontra iti publiko ti aniaman a no-election scenario.
Impasiguro na nga awan iti kasta a mapagsasaritaan ti Kamara de Representantes ken nagpanawagan kadagiti pada na nga opisyales a saan nga aramiden nga armas dagiti ‘tsismis’ iti kabayatan ti sensitibo a sitwasyon ti pagilian.
