LA UNION – Agtultuloy nga im-imbestigaran ti San Fernando City Police Station ti maysa a driver ti para pasahero a jeep kalpasan a natnag ti luganna iti rangkis idiay Barangay Baraoas itay tengngat’ aldaw.
Immuna iti daytoy, nagpasar iti garumiad ti dua a pasahero ti jeep a minaneho ni Arnulfo Galvez kalpasan nga imparadana daytoy iti kanawan a paset ti kalsada ngem kellaat a naguyas a nagpasango agingga a natnag iti derraas nga addaan kauneg nga agarup walo a metro.
Segun iti asawa ni Galvez, naggapu iti sentro ti siudad ti jeep ken nagawiden iti barangayda.
Naamuan pay nga idi nadlaw dagiti pasahero a nagpasango ti lugan ket dagus a nagdisaag dagiti dadduma sakbay pay a natinnag iti derraas ti nasao a behikulo.
