Pinasingkedan ni House Committee on Justice ken Batangas Representative Gerville “Jinky Bitrics” Luistro a mangrugi ti pannakadengngeg dagiti uppat nga impeachment complaints kontra kenni Bise Presidente Sara Duterte inton Marso 2 agingga 4.
Segun kenni Luistro, umuna nga ikeddeng ti komite no umdas iti porma ken linaon dagiti reklamo.
Saan a nairugi a dagus iti komite ita a lawas gapu ta kasapulan pay a makopia ken ited dagiti reklamo kadagiti amin a miembro.
Inlawlawag ni Luistro nga aggigiddan a mapagsasaritaan dagiti uppat a reklamo iti maymaysa nga impeachment proceeding, ngem saan pay a pisikal a mapagtitipon daytoy. Mapasamak laeng ti consolidation no addaan ti probable cause.
Agsina a matalantan ti tunggal reklamo ken tunggal ground, ngem iti panagbutos dagiti miembro ket maibasar iti pakabuklan ti tunggal impeachment complaint.
Maikkan iti respondent ti 10 nga aldaw a mangisubmitir iti sungbat no lumasat iti porma iti review.
Addaan ti tallo nga aldaw iti complainant tapno agsungbat ken tallo nga aldaw met iti respondent para iti rejoinder.
Kalpasanna, maangay iti hearing proper sakbay nga agbotos iti komite ti probable cause.
Posible a napaut iti proseso gapu ta uppat iti reklamo ken mabalin nga adu dagiti grounds a mapagsasaritaan.
Innayon ni Luistro nga iti kinapaut ti hearing ket agpannuray no lumasat dagiti reklamo iti naikeddeng a pagrukodan.###
